Wednesday 7 June 2017

అబ్బా..
అబ్బబ్బా...
ఎండలు..
అలసట..
తలనొప్పి ..
( ఏంటీ తల ఉన్న వాళ్ళకే కదా
తలనొప్పి, నీకెందుకొచ్చింది అంటారా!!
నాకూ ఎప్పట్నుంచో అదే డౌటు..
కానీ నాకూ అప్పుడప్పుడు తలనొప్పి వస్తుంటుంది.)
నడుము నొప్పి..
మందుల్లేని బాధలు..
మందులేసుకోని మొండితనం..
అన్నట్టు ఇది కూడా ఓ రోగమే..
మందు లేని రోగం..
మా అమ్మమ్మ అనేది..
మొగుడు నాలుగు వడ్డిస్తే
 తగ్గే రోగం అని..
పాపం ఇప్పటి మొగుళ్ళకి అంతటి
ధైర్యం ఎక్కడిదీ..
నడిస్తే ఆయాసం..
తినకపోతే నీరసం..
కాళ్ళు నొప్పులు..
ఒక్కోసారి వాపులు..
లేస్తే కూచోలేము..
కూచుంటే లేవలేము..
ఇదేం కేటగిరీ యో అర్ధం కాదు..
డాక్టరు దగ్గరకెళ్తే
మందుల కన్నా ముందు
బరువు తగ్గమంటారు...
ఇంకా ఏవేవో చెప్తారు..
మనకి బొత్తిగా పడనివి..
ఉదయపు నడకకు ఆమడ దూరం...
వ్యాయామం అంటే ఇంకా దూరం..
తిండి తగ్గిస్తే ఒకటే నీరసం..
మిరియాలు తింటే,
పిప్పళ్ళు తింటే,
తాంబూలం వేసుకుంటే,
దాల్చిన చెక్క తింటే,
సబ్జాలు తాగితే,
నిమ్మరసం+తేనే తాగితే,
త్రిఫల చూర్ణం తాగితే...
బరువు తగ్గుతారట...
ఎన్ని సలహాలో..
ఎన్ని చిట్కాలో..
హమ్మయ్య!! శ్రమలేని పని..
సులువుగా బరువు తగ్గచ్చు...
ఓ వారం గడిచినా
చటాకు బరువు తగ్గలేదు..
ఇది కాదు పని అని అన్నీ మానేసా..
నూనెలో వేయించినవి..
స్వీట్లు..
పెరుగు..
ఇవన్నీ కూడా మానేసా..
ఇంతలో ఇంట్లో పుట్టినరోజులు..
పండగలు..
మా పెళ్ళిరోజు..
ఒక్క స్వీటు ..
ఒక్కటే ఒక్కటి అనుకుంటూ..
నాలుగైదు .. లెక్కకి.. అంతే..
చాన్నాళ్ళ క్రితం చూసిన ఫ్రెండు..
అప్పటికీ ఇప్పటికీ
నువ్వు ఏం మారలేదు అని కితాబిస్తే,
పొంగిపోయి, పర్వాలేదులే అనుకుని
తనతో పాటు ఒక ఐస్ క్రీం...
ఏంటమ్మా అప్పటికన్నా చిక్కిపోయావు
అని ఆర్నెల్ల తర్వాత
ఇంటికొచ్చిన కొడుకు ఆరా తీస్తే,
వాడితో పాటు మంచూరియా, పనీర్ కుర్మా..
కాజూ బర్ఫీ.. మలయ్ కోఫ్తా..
మధ్య మధ్యలో పిజ్జాలు, బర్గర్లు,
సమోసాలు, చాట్ లు,
రారమ్మని పిలిచే
 అమూల్ మరియు ఐబాకోలు..
ఏదో పిల్లల కోసం...
ఆరోజుకి ప్రశాంతంగా పడుకున్నా..
తెల్లారే మళ్ళీ భయం మొదలు..
నిన్న తిన్న 100 గ్రాముల టిఫిన్,
యాభై గ్రాముల స్వీటుకి,
ఎన్ని గ్రాముల బరువు పెరిగానా అని..
ఏదో ఓ మంచి రోజు చూసి
వాకింగ్ మొదలెట్టాల్సిందే..
దృఢ నిశ్చయం..
కేలండర్ చూస్తే ఏకాదశి
ఐదారు రోజుల తర్వాత..
ఎలాగూ అప్పట్నుంచి వాకింగ్ చేస్తాం కాబట్టి
ఈలోపు ఒక్క స్వీటు..
పర్వాలేదు..
ఒక్కదానికి పెద్ద బరువు పెరగరు..
నాకు నేనే చెప్పుకున్న ధైర్యం..
ఈలోపు శ్రావణమాసం,
ఆ పై మాసం ఆశ్వయుజం..
నాకు కాకపోయినా
అమ్మవార్లకి పెట్టాలి నైవేద్యం..
అదే తలోకాస్తా ఫలహారం..
అటుపై కార్తీకం..
ఉపవాసాల సమయం..
హమ్మయ్య..
ఇక అక్కర్లేదు..
ఏ వాకింగు, ఏ వ్యాయామం,
తెరిపిన పడే ప్రాణం..
ఇలా ఒక ఏడాది గడుస్తుంది
హాయిగా..
జనవరి ఫస్టుకి
మళ్ళీ సరికొత్త నిర్ణయం..
ఈ ఏడాది ఎలాగైనా బరువు తగ్గాలి..
( గమనిక : ఇది కవిత కాదు... కవిత అనుకుని పొరపడితే నా తప్పు కాదు... పేరాలో రాసేదాన్ని తీసుకొచ్చి, ముక్క ముక్కలుగా చేసి.. వెరైటీగా .. విరిచి... మీ ముందు ప్రదర్శించాను.. ( ప్రదర్శించినది కవిత కాదు, నా అతితెలివి అనుకుంటున్నారా?? అనుకోండి ..నేను మిమ్మల్ని ఆపలేను కదా.. అనుకోకుండా... )

6 june 2017

No comments:

Post a Comment