Wednesday 7 June 2017

కృష్ణ వ్యధ
జాబిల్లి వెన్నెల ని ఒంపేస్తోంది ధారాళంగా ..
చెట్టు పిట్ట నిశ్శబ్దంగా నిదురలోకి జారుకున్నాయి..
నిశి మౌనంగా వీక్షిస్తోంది నువ్వెప్పుడొస్తావా అని.. 
యమున అలల్లాడకుండా నిలచి చూస్తోంది
మన సరాగాలు మొదలవ్వడం కోసం ..
నీ అడుగుల సవ్వడి కోసం ఎద ఎదురుచూస్తోంది..
నీతో ఊసులు కలబోసుకోవాలని
నవ్వే నీ పెదవుల అరుణిమలు పంచుకోవాలని
హృదయం ఆరాటపడుతోంది...
ఏడనున్నావు రాధా ..
ఏల జాగేల రాధా. ...
నీవు అరుదెంచిన వేళ
గాలిలో నీ పరిమళం తేలివచ్చి
నను తాకుతుంది
నీ చిరుపాదాల అందెల సవ్వడి
నా మనో వేదికపై ఘల్లుమంటుంది..
జీరాడే కుచ్చిళ్ళ చిరు సందడి
సన్నని రవమై చెవులకు సోకుతుంది ..
నను చేరాలని తొందరపడే
నీ శ్వాసల బరువు
శబ్దమై నా హృదయానికి చేరుతుంది. .
పరిసరాలు నిన్ను చూసి పరవశమొందుతాయి..
ప్రకృతి నీకు పాదాక్రాంతమౌతుంది..
నీ సుతిమెత్తని నడకలతో
నాదరికి రావా!!
జాము జారిపోయేలోగా
జతను చేరవా! !

 2 june 2017

No comments:

Post a Comment