అబ్బా, ప్రపంచం లో మనుషులందరూ జీవితాన్ని జీవించడం మర్చిపోయి, ఎంత అద్భుతంగా నటించేస్తున్నారో? మాట నటన, మనసు నటన, నడక నటన, నడత నటన, స్వచ్చత లేని మనసు, స్పష్టత లేని మాట. బంధాలు-అనుబంధాలు ఏవి లేవు. రక్త సంబంధాలు మొదలే లేవు. అన్నీ డబ్బు చుట్టూ తిరుగుతున్నాయి. భగవంతుడు ఇచ్చిన సమస్యలకు తోడు, మనం తెచ్చిపెట్టుకునే సమస్యలు కొన్ని, ఈ సమస్యల వలయంలో నటన కూడా అవసరమా? ఖర్మ కాలి ఈ క్షణం ప్రాణం పోతే, మరుక్షణం మనం ఏమి చేయాలన్నా చేయలేమే! తదుపరి ఘడియలో ఏమి జరుగుతుందో మనం చెప్పలేము. మరి బ్రతికిన నాలుగు రోజులు, తృప్తిగా నొప్పింపక, తానొవ్వక అన్నట్టు బ్రతకకుండా ఈ నటనలు ఎందుకు? ఎవర్ని ఉద్ధరించడానికి? నిజానికి మన మనసు పారదర్శకంగా ఉండకపోతే, మనకే మనశ్శాంతి ఉండదు కదా? మరి ఎందుకు తెచ్చిపెట్టుకున్న ముఖాలు, తెచ్చిపెట్టుకున్న నవ్వులు? బ్రతికినన్నాళ్లు పారదర్శకం గా బ్రతకలేమా?