కార్తీక మాస ప్రాశస్త్యం: మూడవ భాగం :

కార్తీకం లో ఉన్ని, ఇంగువ, పుట్టగొడుగులు, గంజాయి, ముల్లంగి, ఆనపకాయ, మునగకాడలు, వంకాయ, గుమ్మడికాయ, వాకుడు, పుచ్చకాయ, వెలగపండు, నూనె, చద్ది మొదలైనవీ, రెండుమార్లు వండిన అన్నం, మాడిన అన్నం, మినుములు, పెసలు, సెనగలు, ఉలవలు, కందులు మొదలైన ధాన్యాలు వాడరాదు.

శివుడు "ఆశుతోషుడు". అంటే వెంటనే సంతోషించే స్వామి. ఆయనకు అలంకారాలతో, నైవేద్యాదులతో రాజోపచారాలతో పనిలేదు. జిల్లేడు, ఉమ్మెత్త మొదలైన విలువ లేని పువ్వులే శివుడికి ప్రీతి. ఇటువంటి అశుతోషి శివానుగ్రహానికి, విష్ణువు అనుగ్రహానికీ ఈ మాసం శ్రేష్టం. అయితే శివుడు అభిషేక ప్రియుడు. అందుచేత, రకరకాలా సంబారాలతో శివాభిషేకం చేయడం అన్ని దోషాలను పోగొట్టి, సకల శుభాలను కలిగిస్తుంది.  కార్తీక మాసం అంతా కార్తీక పురాణం పఠనం, శ్రవణం చేయాలి.

ఈ మాసం లో వచ్చె మొదటి పండుగ దీపావళి. ఈ పండుగను చాలా మంది 4 రోజులు చేస్తారు. ఆస్వయుజ అమావాస్యకు ముందుగా వచ్చే చతుర్దశిని "నరక చతుర్దశి" గాను, అమావాస్య నాదు దీపావళి లక్ష్మీ పూజ గాను, మరుసటి రోజు బలి పాద్యమి గాను, 4వ రోజు "యమ విదియ"గాను జరుపుకుంటారు. లోకులను హింసిస్తున్న తన పుత్రుడి బారి నుంచి లోకులను రక్షించడానికి భూదేవి విష్ణువుతో మొర పెట్టుకోగా, శ్రీక్రిష్ణావతారం లో తన ప్రియ పత్ని సత్యభామతో కూడి నరకుడిని సంహరించిన రోజుగా "నరక చతుర్దశి" ని చెప్తారు. నరకుడి పీడ వదిలిన కారణంగా ఆరోజు, మరుసటి రోజు ఆనందోత్సాహాలతో, దీపాలు వెలిగించి, బాణసంచా కాల్చి వేడుకలు చేసుకుంటారు. ఈ రోజున యముడు తన సోదరి యైన యమున గృహమందు ఆమె వండి వడ్డించగా భోజనం చేసాడు కనుక దీనికి "యమ ద్వితీయ" అని పేరు. ఈరోజున అక్కచెల్లెని చేతి వంట తిని ఆమెకు వస్త్రాలంకారాలు సమర్పించాలి. దీనివల్ల ఉభయులకూ ధనధాన్యాలు ప్రాప్తిస్తాయి. సోదరునకు చిరంజీవనము, దీర్ఘాయుష్షు, మరియు సోదరికి అఖండ సౌభాగ్యము సిధ్ధిస్తుంది.

కర్తీక మాసం లో ఏ మంత్ర దీక్షను తీసుకున్నా గొప్ప ఫలితాన్నిస్తుందని ధర్మ శాస్త్రాలు చెపుతున్నాయి. ముఖ్యంగా ఏకాదశి నుండి పూర్ణిమ వరకు -- ఈ ఐదు రోజులు శివమంత్రం కానీ, విష్ణు మంత్రం కానీ ఉపదేశం పొందడం, దీక్షగా జపించడం ఉత్కృష్ట ఫలప్రదాలు.

(ఇంకా ఉంది )